Discutir sobre si Asturies tenía falta o non d’un estatutu dexó un bon puñáu de testimonios, polémiques qu’ameriten atención y que pueden ayudanos a comprender meyor la historia d’Asturies, la d’España y la rellación ente dambes. Too ello ensin escaecer que, a pesar de l’arrogancia cola que se despachaben acusaciones de provincianismu , lo cierto ye que’l debate empataba con preocupaciones y discusiones que percorríen la Europa de los años trenta. Temes nada menores nin provincianos , anque se formularan en términos locales. Nun tien que nos chocar. Asturies nun vivía nuna burbuya, nin yera una simple cámara de resonancia o receptor pasivu de los debates que bullíen na capital de la República. Ye por eso que, a últimes, y con toles limitaciones que queramos, el debate sobre l’autonomía asturiana fai parte con tol derechu de la conversación pública d’aquella tráxica década de los trenta n’Europa .